MANMERI i mas tingting gut na tok long toktok bilong Bogenvil i kisim Independens, Praim Minista James Marape i tok.

Em i tok disisen na kain gavman Bogenvil bai kisim inap senisim olgeta lukluk na sindaun bilong Papua Niugini.

Em it ok kain ol toktok i save kamapim planti tingting na em i no gutpela long manmeri i kamapim nating ol tok long dispela tok.

Em i mekim dispela tok long bekim ol media ripot olsem em (Marape) i tok Bogenvil bai kisim Independens long 2027.

Em i mekim dispela tok tu bihain long PNG Gavman na Atonomus Bogenvil Gavman i pinisim namba tu Join Supavaisori Bod (JSB) kibung long Wabag, Enga Provins long 28-29 Jun.

Mista Marape i tok long Bogenvil i kisim independens dispela bai kamapim planti senis long Mama Lo bilong kantri na sindaun bilong em.

Em i tok makim bilong 2027 olsem de bilong tokaut stret long disisen bilong palamen long kain gavman bilong Bogenvil bihainim kamap bilong 2019 Referendum.

Em i tok dispela de em Bogenvil gavman yet i makim na i askim JSB kibung long tok orait.

Em it ok i nogat wanpela hap bilong kibung we ol i makim wanpela de bilong givim independens long Bogenvil.

Marape i tok maski Bogenvil i askim long kisim indepenmdens i kamap, i gat luksave olsem i no gat wanpela tok long Pis Bilding Agrimen i tok long “gavman i mas bihainim tok bilong ol pipel long bruk” i stap long Mama Lo bilong kantri.

Dispela i min risalt bilong referendum i “non-binding.”

Em i tok i nogat wanpela samting bai subim gavman long mekim disisen.

Dispela disisen bai i stap long han bilong gavman yet.

Ol JSB bung i kamap bilong lukim tupela gavman i kamap wantain ol rot long bihainim na kamap long tingting we Bogenvil i laikim kain gavman em i laikim long bihain taim.

Long kamapim bel isi bihainim “crisis”, Bogenvil i bin holim referendum long 2019.

I bin gat tupela askim insait long dispela referendum, wanepla askim em long sapos ol manmeri i laik Bogenvil i kisim moa atonomi pawa na ranim em yet na narapela askim em long bruk, lusim PNG na kamap independen.

Long dispela tupela askim, inap long 97.7 pesen i bin vot long kisim independens.

Marape i tok PNG gavman i redi long wok bung wantaim ABG long lukim rijon i lukim kain sindaun em i laikim.

Em i tok PNG na Bogenvil i serim wanpela kalsa, bus, ol maunten, solwara na i sanap long dispela long lukim tupela grup i kamap wantaim wanpela gutpela ansa.

Em i tok gavman i luksave long 2001 Arawa Pis Bilding Agrimen na i wok antap long ol toktok bilong dispela Agrimen.

Em i tok bihainim askim bilong ABG, em bai toktok wantaim palamen na moa yet, gavman i kamap bihain long 2022 jeneral ileksen long painim gutpela rot long surukim displea ol wok i go yet.