INTERNATIONAL Red Cross Committee wantaim ol famili bilong ol lain husat i bin lus long Bogenvil Hevi i opim wanpela hetston long Siwai long Saut Bogenvil we i gatim ol nem bilong ol lain husat i lus long Bogenvil Sivil Woa.

Bogenvil Sivil Woa i bin kamap long 1988 long Not Solomon provins long Papua Niugini. Long dispela taim, wanpela grup bilong ol papa graun long Bogenvil i mekim protes egensim stap bilong Bogenvil Kopa Main long Bogenvil. Dispela kopa main long Bogenvil em bilong Australia na long dispela taim em i bikpela main tru long wol we i operet long Panguna rijon bilong Bogenvil Ailan.

Dispela woa em i bikpela woa long Osenia bihain long Wol Woa 2 we i lukim moa long 15,000 pipel long Bogenvil i dai. Na ol tausen moa pipel long Bogenvil i lus long dispela taim we ol famili bilong ol i no inap tru long painim.

I no longtaim i go pinis, ol kar i pulap wantaim ol famili i kam kamap long dispela ples Siwai we hetston bilong ol lain husat i bin lus long Bogenvil Sivil Woa i sanap long en. Sampela kisim sotkat rot long ples bilong ol na i kam na sampela i bin kirap long bik moning tru long wokabaut i kam long Siwai long lukim dispela het ston i op.

Planti sori na wari i bin pulap long dispela taim, taim ol famili i kam bung na salim tingting i go bek long ol famili bilong ol.

Justin Kumpp em i wanpela man husat i bin bungim hevi long Bogenvil Sivil Woa. Taim em i harim olsem ol i bai opim hetston, em i kam kamap long dispela taim.

“Faivpela famili memba bilong mi i bin lus long Bogenvil Hevi. Papa, mama, susa, bubu man na ankle bilong mi i bin lus long dispela taim. Mi bin liklik tru taim ol i bin lus. Mi bin gat  9-pela krismans tasol taim Bogenvil Hevi i kamap.

“Taim mi gro kam antap, mi gro wantaim wari na bungim planti hevi. Mi no inap tru long kisim gutpela skul bikos papa mama bilong mi lus taim mi liklik yet. Sapos ol i bin stap laip yet, bai mi inap long kisim gutpela skul save olsem ol pikinini bilong nau i gat long en. Mi no save lustingting long ol papa mama bilong mi.

“Mi amamas taim mi harim olsem ol i bai opim hetston, mi no orait yet tasol mi save olsem bihain taim mi kam long soim rispek bilong mi long dispela het ston bai mi kisim bel isi we mi save painim long en,” Kumpp i tok.

Ol famili bilong ol lain husat i lus i save toktok long ol salens ol i save bungim olsem ol i no inap tru long save wanem samting i bin kamap long famili bilong ol, bihain taim bai olsem wanem, na ol i bai go we long kisim helpim. Ol i save paul tu long husat stret i lus na bilong wanem ol i lus. Ol famili i save ripot olsem ol komyuniti na ol sevis provaida i no save luksave gut lon nid bilong ol.

Margeret Sohun husat i lusim brata bilong en i tok dispela hetston i gat nem bilong ol lain husat i bin lus.

“Mipela bai pilim olsem mipela i stap klostu long ol famili bilong mipela i lus bikos nem bilong ol i stap ples klia long dispela hetston. Olgeta pen na sori bilong mipela bai pinis wantaim dispela hetston.

“Mi laik tok tenkyu long ICRC na ol lain husat mekim wok long kamapim dispela het ston long mipela i ken i kam na autim sori bilong mipela,” Margeret Sohun i tok.

Eunar Noreen Karatu i raitim