NESENEL Sif Paia Opisa, Bill Roo wantaim meri bilong en na ol Papua Niugini deliket bilong Paia Sevis i bin opim tupela haus bilong ol wokmanmeri bilong Paia sevis long Kaltex, Wewak, Is Sepik Provins.

Mista Bill Roo i tok em i bin raun long olgeta hap long PNG na i toktok strong long ol paia sevis opisa long ol i mas wok. Em i mekim ol dispela bikos planti toktok i kamap olsem ol opisa i save stap nating na kisim pe.

Em i tok long pasin lotu tasol, bai God i soim ol long asua bilong ol we ol i ken lukim na senis insait long ol paia sevis dipatmen long kantri.

"Na kain haus olsem dispela tupela tude mipela i opim em mani mak bai i antap tumas tasol, wantaim God mipela inap long mekim," Roo i tok.

Nesenal Sif Paia Opisa i tok yumi  bai lukim senis long ol stesin bilong mipla long kantri we ol opisa mas pilim spirit bilong wok na nau em taim bilong wok.