OL Memba bilong Boroko Polis Stesin na CID Drag Skuad i holim wanpela kalabus man long Pot Mosbi, husat i bin ranawe long Boram Haus Kalabus long Jun 13, 2016.

Dispela kalabus man i gat 44 krismas na nem bilong en Ronald Lunge. Em bilong Yangoru long Is Sepik Provins.

Ronald i bin i go insait long haus kalabus bikos em i bin kilim meri bilong en.

Ol save lain long polis i luksave long i go i kam bilong en long Pot Mosbi na bihain long ol i putim was long en, ol i holim em long Manu Atopot long las wik.

Em i nau stap long Boroko sel na ol i wok long stretim ol pepa bilong en long salim em i go bek long Boram Haus Kalabus.