KATOLIK sios i laikim gavman bilong Papua Niugini i bihainim wokmak bilong en long sapotim Katolik sios wantaim mani long ranim ol helt na edukesen program insait long kantri olsem i stap insait long agrimen ol i bin wanbel long en.

Presiden bilong Katolik Bisop Konprens long PNG na Solomon Ailan na Asbisop bilong Madang, Asbisop Anton Bal i tok gavman i promise m bai i sapotim ol sios long wok bilong karim helt na edukesen sevis i go long ol pipel.

Em i tok Katolik sios em i no wanpela ejen bilong gavman tasol em i patna bilong gavman.

“Mipela i bin givim ol sevis bilong helt na edukesen long kantri bipo long gavman i kam insait na givim ol dispela sevis. Bai mipela i go het yet long givim ol dispela sevis sapos taim gavman i go.

“Gavman i bin tok promis long sapotim mipela wantaim mani long karimaut ol sevis bilong helt na edukesen. Maski dispela em i wokmak bilong gavman, mipela i bin mekim komitmen long wokbung wantaim gavman na karimaut ol dispela sevis wantaim gutpela bel. Tasol Gavman i abrusim wokmak bilong en na i no givim mani long mipela long karim aut ol dispela sevis,” Asbisop Anton Bal i tok.

Em i tok, gavman i no save givim mani tasol em i save stap insait long ol intenel menesmen na seleksen proses.

“Gavman i no save toksave long mipela o kisim tingting bilong mipela long wanem ol bikpela senis ol i laik mekim, ol i save i go het na mekim ol senis long laik bilong ol na bihain ol i save laikim mipela long bihainim na givim ol dispela sevis long ol pipel.” 

Long olgeta helt fesiliti na ol skul long kantri, Katolik sios i lukautim 248 helt fesiliti na 3,731 skul long kantri.

Rebecca Negere i raitim