WOK bilong jenelis em i no wanpela isi wok ol meri i save mekim. Ol meri husat i gat bel i mas strong long mekim dispela wok bilong jenelis.

Planti taim ol meri i save go long ol ples we i gat hevi olsem pait o ples we stil pasin i save kamap long kisim nius. Dispela kain wok i soim olsem ol meri husat i strong moa i ken mekim dispela wok.

Las wik Trinde sampela meri jenelis i bin bung na toktok long dispela.  Ol i toktok long bungim ol meri jenelis na tu ol wok ol meri jenelis i wok long mekim, na tu ol i toktok long jenda ikwaliti. Ol i toktok tu long mas i gat sampela luksave long ol kain wok ol i mekim long en.

Sosel komyunikesen Opisa  bilong Catholic Bishop Conference (CBCPNGSI),Abigail Seta i tokim dispela bung long astingting bilong wok jenelis na husat i save mekim dispela wok bipo.

Mis Seta i tok, “Long bipo ol meri jenelis i save yusim ol narapela nem taim ol i ripot long nius. Ol i save mekim olsem long haitim ol yet long ol pipel i mekim nogut long ol.

Ripota bilong CBCPNGSI Jessica Oata i tok amamas long ol meri husat i wok jenelis na em i tok ol i mas kamap strong long dispel wok we bipo ol man tasol i save wokim.

Ol i pasim bung bilong ol na tok husat yangpela man na meri i laik wok jenelis i mas mekim wok painim aut long ol samting i wok long kamap tude.

Samantha Solomon i raitim