SIAMAN bilong gavman bisnis na Siaman bilong Lo na Oda long Niu Ailan Provinsal Gavman Edwin Maingen i no amamas long ol toktok bilong Kavieng MP na Treserea Ian Ling-Stuckey.

Mista Maingen i tok Mista Ling-Stuckey i no save long wanem samting em i toktok long en taim em i tok olsem wanpela inkwairi we Niu Ailan Lejisletiv Asembli (NILA) i bin kamapim long Jun 18, 2021, em i giaman long bagarapim narapela tasol.

Mista Maingen i tok dispela ol toktok bilong Mista Ling-Stuckey i antap tasol na i soim olsem em i no save long lo bilong tripela gavman sistem.

“NILA i kamap na stap bihainim lo bilong kantri we mama lo bilong kantri em i suprim.

“NILA i laik lukluk long ol hevi bilong graun long Kavieng we Mista Ling-Stuckey yet i bin askim ol askim long en.

“Em i stap long lukluk long interes bilong ol pipel na tu ol husat i save baim takis long Niu Ailan na kantri olgeta,” Mista Maingen i tok.

Em i rausim ol toktok bilong Mista Ling-Stuckey olsem inkwairi komiti i kamap long bagarapim ol National Alliance Pati projek na program long provins.

“I no gat program o projek tasol NILA bai lukluk go insait long we ol rais na loli i go na sapos ol i bihainim lo,” Mista Mainge i tok.

Em i tok strong olsem NILA bai i go het long bihainim ol lo bilong kantri na bihainim ol gutpela prektis na ol promis ol i mekim pinis.

Niu Ailan provinsal gavman i bin kamapim NILA olsem wasdok long mekim ol wok painimaut na inkwairi long ol isu bilong ol pipel bilong Niu Ailan stret. Em bai i mekim wok tu long sekim wokmak bilong ol memba bilong palamen long Niu Ailan.