OL Sentral Provins sumatin long University of Papua New Guinea (UPNG) i laik lukim sampela gutpela senis i kamap long provins bilong ol.

Las wik ol i bin holim wanpela Sentral Provins divelopmen bung long National Research Institute long tripela de (Jun 30 – Julai 2) we ol i bung wantaim ol lida bilong ol long palamen.

Namel long planti toktok ol i mekim ol i laik lukim Sentral Provins i mas gat gutpela edukesen sevis bilong inapim ol yangpela bilong ol.

Gavana Robert Agarobe husat i bin stap long dispela bung i tok, long kamapim wanpela gutpela edukesen sistem insait long provins ol i mas stat wantaim ol samting i stap pinis long en.

“Mipela i mas stretim ol samting olsem bagarap klasrum na ol arapela samting i stap insait long skul pastaim,” Agarobe i tok.

Ol arapela samting ol i toktok long en em Sentral Provins gavman plen, baset bilong provins, helt, graun, ikonomi bilong provins na ol rot bilong mekim bisnis.

Tupela memba bilong palamen husat i stap long dispela bung long namba wan de em Abau MP, Puka Temu na Rigo MP, Lekwa Gure.

Moa long 100 manmeri na sumatin i bin stap long dispela bung. Ol sumatin aninit long lidasip bilong Sentral Studen Asosiesen Presiden Gerea Harry na namba tu bilong en Ricky Makavo i go pas long kamapim dispela divelopmen bung.

Ol memba bilong Sentral i givim gutpela bekim long ol tingting ol sumatin i gat na kamapim dispela bung.

Samantha Solomom i raitim