KATOLIK Bisop Konprens bilong PNG na Solomon Ailan (CBC) i laik gavman i mas putim strongpela lo bilong ranim casino bisnis na ol pipel husat i pilai laki long casino.

CBC i tok casino em i bilong ol manmeri husat i gat planti mani long tromoi long ol kain pilai olsem na i no bilong ol olgeta PNG sitisen.

“Mipela i no sapotim dispela casino long kantri bikos casino bai kamapim moa bagarap long famili laip na long kantri tu, olsem na gavman i mas kamapim strongpela lo we i ken banisim casino,” Bisop bilong Bereina Otto Separy i tok.

Bisop Otto i tok mobeta gavman i yusim ol mani ol i kisim long casino long sapotim ol pipel na bildim ol rot, skul na helt fesiliti long kantri. Dispela em ol sevis we ol pipel i nidim tru.

Long strongim dispela tok moa Kardinel Sir John Ribat i askim sapot bilong olgeta sios long kantri long wok bung wantaim long skulim ol pipel long wanem samting gavman i wokim wantaim casino.

Em i tok bikpela askim em, “Mipela i laik save moa long wanem samting tru i kamap long kantri wantaim casino?

“Planti pipel i stap long viles na ol setelmen i painim mani long baim skul na besik nid bilong famili,” Kardinel Ribat i tok.

Ol bisop i tok strong olsem casino i ken bagarap kantri na tu bai mekim famili bilong ol lain husat i yusim casino i stap olsem ol tarangu lain.

Long pinis bilong konprens bilong ol las wik Katolik Bisop Konprens i salensim gavman long kontrolim casino bisnis wantaim strongpela lo na banisim ol liklik pipel.

Jacklyn Kimala i raitim