MINISTA bilong Helt na HIV Jelta Wong i no amamas long toktok bilong Ekting Oposisen Lida Dr Allan Marat long ol toktok i no gat mining long dispela lo bilong pAndemik.

 Ol oposisen i no bin toktok long taim bilong mekim dispela lo i kamap. Dispela pandemik lo em i helpim ol pipel long stap isi na ol wok bisnis na olgeta samting i ran gut.

“Wanem toktok memba bilong Rabaul i tok em i no gutpela long kain taim olsem long ol pipel i laik harim ol tru toktok long ol memba na lida bilong ol,” Minista Wong i tok.

Minista Wong i tok, “kain ol toktokolsem i soim olsem ol oposisen i no gat tingting long wanem samting i wok long bagarapim kantri i stap.”

Minista Wong i tok, “sapos ol oposisen i laik tok tok long ol mani samting gavman i no yusim gut ol i mas gat ol evidens na toktok. Ol oposisen husat i gat tingting tru long wok i save gat ol samting olsem polisi na i no toktok nating.

Long ol taim olsem bikpela sik i wok long kamap i stap mipela i nid long wok bung wantaim. Mipela i lukim wanem samting i kamap long India na Indonesia. Dispela i mas mekim mipela long wokbung na ol oposisen tu i mas mekim ol polisi na i no ken toktok long bagarapim ol samting, Minista Wong i tok.

Mipela i bai wok long helpim ol bisnis wok i go yet na kamapim ples bilong ol manmeri long mekim wok.