OPIS bilong Ilektoral Baundri Komisen (EBC) i givim toksave long olgeta provins na distrik bilong kantri long salim fomol sabmisen bilong elektoral baundri sevei long Julai, 2021.

Dispela toksave em EBC Siaman na Ekting   Ilektoral Komisina Simon Sinai i bin mekim long Pot Mosbi. Sinai i tok ol deit nau i redi long komisen i mekim wok painimaut long ol baundri long olgeta provins stat long dispela mun.

“Bikos long COVID-19 ristriksen na protokol disisen bai kamap long foapela rijon bihainim tok orait bilong ol komisina,” em i tok.

Siaman Sinai i tok as bilong dispela raun bilong ol komisina em long sekim laik bilong ol pati olsem provinsa l edministresen, ol LLG presiden, Wod kaunsila, pablik, ol narapela NGO, na bisnis komyuniti long wok bung wantaim na kamapim infomesen bilong komisin long givim long Nesenel Palamen.

Pastaim baundri sevei ol i bin mekim long 2006 bihain long ol i kamapim namba wan taim long 1977. Dispela yia i makim 15 krismas bilong riviuim ilektoral baundri aninit long seksen 125 bilong konstitusen.

“Yumi gat 89 open ilektoret na 22 provinsal ilektoret i kamapim 111 ilektoret na nau i nogat wanpela senis i kamap na ol olpela ilektoret i stap yet. 

“Tasol, wantaim populasen i wok long i go antap namel long dispela taim komisen i pilim olsem ol i mas mekim sampela senis long ol baundri. Olsem na ilektoral baundri komisen bai mekim wok painimaut insait long ol provins na lukim nid bilong ol long kamapim ol nupela ilektoral baundri o nogat,” Sinai itok.

Aninit long seksen 36 bilong Ogenik lo ol baundri bilong open ilektoret bai i senis bikos long populesen, fisikol na komyunikesen, Lokal level na provinsal gavman na narapela edministretiv eria, komyuniti na interes we yumi inap kamapim nupela.

Long wankain taim yet komisina McRonald Nale husat em i wanpela EBC komiti i soim olsem sampela salens na sot komisen bai inap bungim.

“Komisen bai sekim 9-pela ilektoret. Tasol Ogenik Lo i tok 120 ilektoret na komisen bai i no inap mekim olsem. I luk olsem moa pipel i ting olsem sampela moa baundri mas kamap tasol lo i no tok orait long ol dispela samting long kamap,” em i tok.

Nale i askim olgeta provinsal na distrik edministreta long wok bung wantaim na stat raitim edministresen pepa na redim long givim long ol sevei komiti long taim ol i kam raun long distrik na provins.

Sevei bai kamap long Julai 5 i go inap long Julai 20, 2021 insait long foapela rijon na ol provins i stap insait long ol. Komisen i laik pinis dispela wok na givim toksave long Ogas long taim Palamen i bung pastaim long ol i openim writs bilong 2022 Nesenel Jeneral Ileksen long Epril 2022.

Joseph Dawai i raitim