SIAMAN bilong Madang Turis Indastri Asosiesen (MTIA) na Presiden bilong Madang Chamber ov Komes Sir Peter Barter i bin bung wantaim ol memba long toktok long  Madang ples balus we bai pas long Julai 23 i go long Ogas 8 2021.

Dispela bai pasim olgeta Air Niugini balus long pundaun long Madang ples balus.

Sir Peter  i tok ol liklik balus na helikopta tasol i ken pundaun long ples balus. Ol memba bilong MTIA husat em ol hotel na ol bisnis haus i no amamas wantaim hau National Airports Corporation (NAC) i wok long mekim ples balus long Madang. Ino gat gutpela plen, enjiniaring na menesmen.

Dispela bai bringim bikpela hevi long ikonomi bilong Madang bikos planti hotel na bisnis bai pas. Planti bilong ol dispela hotel na bisnis i save dipen long balus we i save karim ol kastoma i go kam long Provins.

Balus em wanpela bikpela rot bilong komyunikesen na seif trenspot long PNG. Em i save karim ol pipel, kago, marasin na sampela taim bodi bilong ol lain i dai.

Mista Barter i tok long pasim ples balus long dispela taim namel long COVID-19 em i no gutpela.

“Mi stap 55 krismas long Madang na i nogat wanpela taim dispela kain samting i bin kamap. Dispela em namba wan taim. Ples balus i save pas tasol taim weda i no gutpela,” Sir Barter i tok.

Long wankain taim, Ekting Menesing Dairekta bilong NAC, Rex Kionge i tokim MTIA na Chamber ov Komes olsem “Rikonstraksen bilong ples balus i stap long stej 5 nau na plen long pinis long Julai 22, 2021. Dispela i dipen long weda. Ples balus bai inap tasol long Twin Otter na ol liklik balus long pundaun long 3-pela wik taim konstraksen i stap,”

“Ples balus bai redi long Air Niugini balus olsem F100 NA F70 long pundaun long Oktoba 31,”

NAC i askim ol pipel na ol bisnis ona long Madang long wet isi inap ples balus i pinisim wok konstraksen bilong en.

Sir Barter i tok em i pasim tok wantaim ol sata balus long bes long Madang na givim sevis i go long Madang na Hagen, Madang na Nadzab, Madang na Goroka rot. Bai gat moa toktok bilong dispela sevis neks wik.