DISTRIK Divelopmen Atoriti (DDA) bilong Nipa Kutubu i givim K30 milien long edukesen long 8-pela yia i go pinis.

Nipa Kutubu distrik long Sauten Hailans Provins em i namba wan distrik insait long kantri we i givim bikpela mani long edukesen sekta insait long distrik bilong em.

Memba bilong ol, Jeffery Komal, i tokaut long dispela, taim ol i opim wanpela dabol klasrum long Poroma Praimeri Skul Long Poroma Lokel Level Gavman (LLG).

Komal i tok, wanpela dabol klasrum em i mani mak long K150, 000.00 we em i inap long 80 sumatin bai stap insait.

“Bilong dispela 80 sumatin, 40-pela sumatin bai stap long wanpela na narapela 40 sumatin baistap long narapela klasrum,” Komal i tok.

Komal i tok moa olsem distrik i givim mani mak long K20 milien long praimeri edukesen sekta tasol.

“Dispela mani em i bilong kamapim 121 dabol klasrum bilong olgeta praimeri skul insait long 5-pela LLG long distrik,” Komal i tok.

“Dabol klasrum bai no inap long sevim ol sumatin bilong tude tasol, nogat. Em bai stap oltaim bilong sevim ol sumatin bai kamap long bihaintaim tu.”

Memba i tok moa olsem DDA i kamapim ol dispela dabol klasrum na antap long en, em i kamapim planti haus bilong ol tisa, we i gat 3-pela rum, long sampela skul.

“Kamapim haus bilong ol tisa em i namba tu plen we DDA I tingting long kamapim.

Long wankain taim, Robin Tuna, man husat i go pas na plenim ol dispela wok long distrik i toktok tu long sampela samting moa i kamap long distrik long sait bilong edukesen.

“Nau mipela i gat nupela koles bilong tisa we ol namba wan sumatin bai kam insait long skul long yia I kam. Dispela em i bilong kisim digri pepa,” Tuna I tok.

Memba bilong distrik, Komal, i tok moa long dispela olsem DDA bai baim ol tuisen fi bilong olgeta sumatin insait long distrik husat i kisim pepa long skul long dispela kolis.

Philemon Tame i raitim