WANPELA raskol pasin we i laik kamap long 6 Mail long Pot Mosbi i no bin kamap bikos ol lain i stap long dispela hap i toksave kwik taim long polis opisa husat i save lukautim dispela  eria.

Dispela polis opisa em namba wan Konstabel Meken Kaki bilong Wapenamanda long Enga Provins. Em i save wok long 6 Mail Polis Stesin.

Wok bilong en long wan wan de em long lukautim o givim sevis bilong polis long ol stua na bas stop long 6 Mail eria. Em i save stap long dispela hap olgeta de long 6 klok moning i go inap 6 klok apinun.

Long taim  bilong em long malolo em i no save lusim wok na i go stap long haus.

Em i stap olsem namel man long dispela hap tu. Taim ol sekyuriti long dispela hap i luksave olsem ol raskol pasin i laik kamap ol i save toksave long em na em i ken salim toksave i go kwiktaim long ol polis.

Polis Stesin Komanda bilong 6 Mail i mekim plen long sapotim sefti bilong pablik long 6 Mail eria olsem na namba wan Konstabel Kaki i save stap olgeta de long dispela hap mekim dispela wok.  

 Long taim Konstabel Kaki i kisim toksave long pasin raskol i laik kamap, em i ranim dispela tupela saspek.

Wanpela soldia bipo, Scot Dylan, husat i stap long dispela hap i lukim na em i helpim Konstabel Kaki long ranim na holim tupela saspek. Ol arapela i ranawe.

Konstabel Kaki i tok ol dispela saspek i wok long giaman raun long eria long mekim raskol pasin taim ol i luksave long ol na holim ol.

Ol i painim sampela bulet bilong gan insait long poket bilong ol dispela saspek.