WANPELA loya man husat i gat 31 krismas na i wok wantaim Konstitusenel Lo Rifom Komisin (CLRC) i kisim Masta bilong Lo na Divelopmen long Yunivesiti bilong Melbourn, Australia.

Benjamin Bofeng em i namba 2 loya long CLRC long kisim dispela pepa bilong en na em bilong Sepik, Morobe, na Westen Hailans

Em i bin winim 2020 Australia Awod Skolasip na insait long dispela em i pinisim wanpela 15 mun program long Mas 2021.

Mista Bofeng i tok dispela program i lukluk long divelopmen bilong Lo wantaim strongpela tingting long lukluk long ol strongpela lokal PNG wei taim ol i laik kamapim ol lo. Na i no lukluk o kisim tingting long ol arapela kantri long kamapim lo insait long PNG.

“Dispela program i bin helpim mi long bringim bek sampla samting i go long CLRC na kantri. Taim ol lo rifom na riviu i laik kamap bai mi strongim ol long kamapim ol Lo we i go gut wantaim kalsa na wei bilong PNG,” em i tok.

Nau em i kisim promosen olsem Sinia Legal Opisa insait long draf na edvaisari divisen. Mista Bofeng i tok tenkyu long gavman bilong Australia na PNG long skolasip nae m it ok tenkyu tu long CLRC long i go pas long dispela skolasip.

Seketeri bilong CLRC, Dokta Mange Matui i tok dispela gutpela samting we i kamap long Mista Bofeng em bikos em i wanpela gutpela wokman taim em i bin kam statim wok long 2014 yet.

“Bikpela tingting na lukluk bilong bipo na nau em long givim sans long ol wokmanmeri i ken i go skul long ovasis. Dispela bai helpim ol long i go het na mekim planti samting na kisim gutpela laip.”

Em i tok moa olsem i gat ol plen i stap long planti wokmanmeri bai go ovasis long skul na kisim moa save.