PLANTI pipel i bin paul na komplen long nupela lo em opis bilong Kontrola bilong COVID-19 Nesenel Pandemik, David Manning i bin tokaut long en las wik. Dispela lo i toktok long ol pipel husat i mas kisim COVID-19 banis sut pastaim long ol i kalap long balus.

Kontrola i bin tok ol pipel i kam long balus long ovasis na insait long kantri tu i mas kisim veksin bilong COVID-19 pastaim.

Bihain long planti komplen i kamap long dispela nupela lo, Kontrola Manning i mekim sampela senis gen long Julai 2, 2021 na nau bai ol lain i kam long ovasis tasol bai i mas kisim sut na stap long kwarentin long taim ol i kamap long kantri.

Ol sampela sitisen husat i no bin wanbel long dispela lo i bin mekim planti toktok bikos ol i tok PNG em i demokretik kantri na no gat wanpela man bai fosim narapela long mekim wanpela samting we em i no laikim.

Sampela i tok lo bilong kisim veksin we i kam long World Health Organization i tok em i laik bilong yu sapos yu laik kisim veksin o nogat na i no gat wanpela man bai fosim yu long kisim.  

Michael Motan, wanpela haiskul tisa long Kainantu i tok, “PNG i mas kirap na rausim ol dispela lo bilong COVID-19 we i wok long fosim ol sitisen long kisim veksin. Dispela em i no demokretik.”

Narapela meri husat i save wok long wanpela maining kampani, Dorish Nari i tok, “Mi yet na ol lain i stap long haus bilong mi bai no inap long kisim veksin. Sapos dispela i min olsem mi mas lusim wok, em bai mi lusim wok tu.”

Tasol, Dokta Daoni Eserom, Deputi Kontrola i tok ol dispela lo we Kontrola i bin givim em long banisim ol sitisen long kisim COVID-19 we i kilim pinis 175 pipel long kantri.

“Mi singaut long olgeta sitisen long luksave gut olsem ol i mekim sampela senis long lo we i kam pastaim long sait bilong domestik trevol we i bin mekim manmeri i ting ting planti. Olsem na ol i mas luksave gut long ol senis i kamap long ol dispela lo na kisim gutpela tingting. Dispela lo i kamap long banisim ol yet na famili bilong ol,” Dokta Esorom i tok.

Ol senis we i kamap long domestik trevol lo long Julai 2, 2021 i soim ol mesa bilong abrusim COVID-19 long taim yu raun long balus tasol yu no inap kisim veksin pastaim long yu raun long balus.

Dokta Daoni i singaut long ol wan wan manmeri na ol grup na ol ogenaisesen husat i bin egensim ol mesa i kam long opis bilong Kontrola long no ken givim ol giaman infomesen long ol pipel.

Rebecca Negere i raitim