Transparency International Papua Niugini (TIPNG) i tok long lukim gutpela 2022 Nesenel Jeneral Ileksen (NGE) i kamap, pablik i mas bilip long PNG Ilektoral Komisin (PNGEC).

Long kisim bek bilip bilong pablik long PNGEC, gavman i mas bihainim ol stretpela proses bilong makim nupela lida we i ken go pas long lukautim opis bilong PNGEC.

“Ol pipel bilong Papua Niugini i lukluk long foapela memba bilong komiti em Praim Minista, Lida bilong Oposisen, Siaman bilong Pemenen Palamenteri Komiti long Apoinmen na Siaman bilong Pablik Sevis Komisin long mekim gut wok bilong ol long lukautim gutpela nem bilong apoinmen proses.

“Bihainim apoinmen bilong het bilong PNGEC, wokmas i kamap kwiktaim long apdetim ilektoral rol. Dispela tu em i bikpela samting,” Siaman bilong TIPNG, Peter Aitsi i tok.

Em i tok long Jun 2, 2021 long taim bilong Mosbi Not Wes Bai Ileksen, TIPNG i bin kisim tingting bilong gavman long kamapim Ilektoral Komisin Apoinmen Komiti we Praim Minista bai kamap siaman na ol i mas stat kwiktaim long makim nupela het bilong PNGEC.

“Long Tunde Jun 29, posisen bilong Ilektoral Komisina i bin kamaut long niuspepa na aplikesen bai pas long Ogas 6, 2021.” Mista Aitsi i tok.

TIPNG i singaut long Praim Minista na gavman long mekim 2022 NGE i kamap namba wan wokmak bilong ol na bringim bek gutpela nem bilong PNGEC edministresen. Na long wankain taim mekim ilektoral rol i kam ples klia long pablik, bai pablik i ken sekim nem bilong ol na ol lain husat i nogat nem i ken givim nem bilong ol.