KATOLIK Bisop Konprens bilong PNG na Solomon Ailan i sapotim tingting bilong Praim Minista James Marape long lukluk i go long ovasis long makim het bilong Independen Komisin Egens Korapsen (ICAC).

Praim Minista Marape i mekim dispela disisen i no long taim i go pinis, long pinisim pasin korapsen insait long kantri na pasin bilong wantok sistem we i save kamap long ol het bilong dipatmen husat i save wansait long ol famili na pren bilong ol.

Praim Minista James Marape i tok namba bilong braiberi na wantok sistem long ol bikpela gavman dipatmen i antap tumas na i kamapim planti tingting long kantri.

Asbisop Rochus Tatamai i tok Katolik Sios i sapotim dispela tingting bilong Praim Minista Marape, tasol em i tok tu olsem dispela i soim olsem yumi nogat bilip long yumi yet.

“Dispela bai kostim bikpela mani long kisim ol lain long ovasis long i kam long mekim wok bilong yumi na tu dispela i soim olsem yumi nogat bilip long yumi yet na yumi no bilip long ol sistem bilong yumi yet.

“Dispela i soim tu olsem yumi nogat bilip na strongpela tingting namel long ol populesen na ol lida bilong yumi long kantri,” Asbisop Rochus Tatamai i tok.

Em i tok moa olsem bikpela salens nau long ol pipel long Papua Niugini em long bringim bek bilip na strongpela tingting long wanpela na narapela na tu namel long ol populesen na ol lida.

“Yumi mas wok hat nau long bringim bek bilip na strongpela tingting long ol proses na sistem bilong yumi. Sapos yumi no mekim olsem bai yumi go het long lukluk i go ovasis long ol lain we mipela i ken bilip long en long mekim gut wok insait long ol bikpela opis bilong gavman bilong PNG.”

Rebecca Negere i raitim