MELANESIA FAUNDESEN long Madang i kamapim wanpela buk i tok klia long ol pipel bilong Papua Niugini long dispela sik COVID-19.

Melanesen Faundesen i kamapim dispela buk wantaim helpim bilong Australia Hai Komisin na Ok Tedi Mining Limited.

Melanesen Faundesen i bin wokbung wantaim Profesa Glen Mola, Papua Niugini Institute of Medical Research (PNGIMR), ol arapela savelain bilong marasin na yunivesiti long raitim dispela buk.

Hai Komisina bilong Australia, Jon Philip, i bin go long Madang long 11 Jun taim ol i tokaut long dispela buk.

Mista Philip i tok dispela buk i bai helpim ol manmeri long luksave long planti tok giaman i wok long kamap long dispela sik.

Dispela buk bai i ken helpim planti manmeri long luksave long ol hevi em COVID-19 i save kamapim na stiaim ol long kisim sut bilong banisim sik COVID.

“Yumi i laik ikonomi bilong kantri i mas kamap gut gen olsem na yumi i mas kisim sut,” Mista Philip i tok. Dispela buk i gat ol bekim bilong ol planti askim na toktok i wok long kamap long dispela banis sut.

Dispela bung i bin kamap long Madang Modilon General Hospital. Ol i tokaut tu long givim Oxford AstraZenecca veksin long Madang Provins.

Jon Philip i tokim ol pipel olsem em i amamas long kisim namba tu raun bilong dispela banis sut.

Jon Philip i tok, “Yumi mas mas tingim ol famili na pren long ol komyuniti bilong yumi”

Planti ol wokman na meri bilong haus sik i kisim dispela sut na em i soim gutpela piksa bilong Madang na bai ol visita I no ken pret long go raun long hap.