MEMBA bilong Yangoru Sausia na lida bilong People First Party, Richard Maru i tok gavman i gat plen na wokmak long kamapim 500,000 smol na midium entaprais (SEM) long yia 2030.

Tasol gavman i no inap winim dispela mak sapos em i laik groim SME sekta wantaim 50,000 SME tasol.

Mista Maru i tok gavman i singaut na toktok strong long ‘Kisim Bek PNG’ long mekim em i narakain long las gavman wantaim plen long sapotim ol sitisen bilong en long kamapim ol bisnis.

“Taim bilong toktok em i pinis,” Mista Maru i tok.

“Gavman i no ken toktok long putim sid mani long Nesenel Divelopmen Benk (NDB) na ol arapela benk na stop long hap.

“Las gavman i bin givim moa long K500 milien long NDB long 8-pela krismas na em i daunim interes rate long mak bilong 10 pesen i go daun long 6.5 pesen na dispela rekot i sanap yet,” Mista Maru i tok.

Mista Maru i tok em i amamas long sapot Marape gavman i givim long NDB na BSP aninit long Stimulus Pekej, tasol dispela sapot em i sot tru long hamas mani MSME sekta i nidim long pusim em long gro na kamap bikpela.

Gavman i mas mekim moa long sapotim ol tausen moa pipel bilong en long go insait long fomol bisnis.

Ol pipel bilong yumi i no ken stap nating tasol long sait na lukluk long ol wok divelopmen i kamap long graun bilong ol.