GAVMAN bilong Australia i givim K5 milien long Lae Distrik Divelopmen Atoriti (LDDA) bilong wokim helt fesiliti.

Siaman na Memba bilong Lae, John Rosso, i tokaut olsem dispela bikpela mani Gavman bilong Australia i givim em i bilong wokim nupela helt fesiliti long Milfodhaven long Lae siti.

Hai Komisina bilong Australia, Jonathan Philp, Minista bilong Helt, Jelta Wong, Seketeri bilong Helt, Dr Osborne Liko, na ol narapela opisa i bin go long Lae long lukim dispela nupela hap bilong sanapim ol helt fesiliti.

Mista Rosso i tok, i gat tupela helt fesiliti we ol i statim wok pinis long distrik em long West Taraka na Tent Siti.

“Helt fesiliti bai kamap long Milfodhaven em i wanpela bilong tupela fesiliti mipela i wok pinis long distrik,” Rosso itok.

“Helt fesiliti long Milfodhaven em ol i bin sanapim long yia 1964. Na dispela K5milien em i redi bilong statim dispela wok na wokim fesiliti i kamap nupela gen.

“Ministri bilong Helt na ol patna bilong dona bai wok bung wantaim na i helpim dispela wok.”

Rosso i tok moa olsem, i gat planti fesiliti ol bai wokim, tasol nau ol i tingting long wokim ol helt fesiliti bikos olgeta sik pipel i wok long go long Angau Memorial Haus Sik tasol na em i pulap tru.

“Mipela bai i gat klinik long olgeta kaunsil wod na ol lain husat i sik bai go long klinik long wan wan kaunsil wod bilong ol,” Rosso i tok.

“Ol dispela klinik bai i gat hap bilong X-Ray, hap bilong stretim tit na wod bilong karim pikinini.

“Mi tok tenkyu long Gavman bilong Australia na Asia Divelopmen Benk (ADB) bilong givim mani long stretim helt fesiliti long West Taraka na long Tent Siti.

“Lae em i namba tu siti long kantri na em i bikpela samting tru we mipelai gat dispela sevis bilong helt.”

Mista Wong i tok, Milfodhaven i stap long namel hap we planti pipel bai kam.

“Sapos mipela i mekim wanpela bikpela helt fesiliti long hia bai em inapim planti sik lain na Angau bai malolo liklik,” Wong i tok.

“Bihain mipela i ken lukluk long mekim sampela moa fesiliti long Angau na em i ken kamap riferel haus sik.

“Helt dipatmen bai wok bung wantaim ol patna bilong redim mani bilong mekim ol dispela wok.”

Philemon Tame i raitim