NUPELA memba bilong Mosbi Not Wes Ilektoret em Lohia Boe Samuel.

Mista Samuel i win wantaim 23,059 vot. Mista Samuel i bin kamap namba tu long las ileksen. Nau long bai-ileksen bihain long Sir Mekere Morauta i dai na lusim dispela sia, Mista Samuel i resis wantaim 41 arapela kendidet na em i win.

Man i kamap namba tu ples em Joseph Tonde wantaim 10,966 na bihain long em Thadeus Kambanei wantaim 8,289.

Sengol Alphonse Parkop, pikinini man bilong NCD Gavana Powes Parkop i givim gutpela resis tru long Mista Kambanei tasol em i pinis long namba foa ples wantaim 8,250.

Wanpela meri tasol husat i bin resis, Anna Kavana Bais i bin sindaun long namba na faiv na sikis ples inap em i lus long las kaunt.

Olsem wanpela sapota bilong Lohia Boe Samuel,  Jerry Pip i tok, “Em i gutpela Lohia i win. Lohia i no toktok planti long wanem samting em bai i mekim. Taim em i lus long Sir Mekere, em i bin wanbel na go het wantaim ol wok bilong em wantaim ol pipel bilong em.”

Wantok Niuspepa i askim Mista Pip sapos em bai i votim Mista Samuel long nesenel jeneral ileksen neks yia na em i tok, “Em sapos nem bilong mi i stap long komon rol. Mi sanap long lain long dispela ileksen na mi nogat nem.”

Mista Samuel em i wanpela pikinini bilong ol Motu-Koita. Em i 40 krismas bihain long wanpela Motu-Koita i holim dispela opis bilong Mosbi Not Wes ilektoret.