MOA mama long Hela Provins i wok long go skel long klinik taim ol i gat bel na planti bilong ol i go karim bebi long haus sik.

Dispela senis i kamap bihain long provinsal gavman i stretim ol helt fesiliti na i givim trening long ol helt woka. Ol development patna i bin givim helpim tu long mekim ol dispela wok.

Ripot bilong National Health Information System (eNHIS) data long 2020, i lukim Hela i gat 20 pesen moa mama i bin go karim bebi long haus sik na ol belmama tu i go skel. 

Dispela senis tu em i kaikai bilong divelopim skil bilong ol woka aninit long program ol i kolim Wok Bung Wantaim. Dispela program i bilong apim mak bilong helt sevis insait long Hela Provinsal Helt Atoriti (PHA) na Nesenel Dipatmen bilong Helt.

Dr Sylvester Tati bilong Hela Provinsal Haus sik i bin go pas long kamapim dispela 6-pela mun trening program long Tari. Na ol 13 komyuniti helt woka long ol 9-pela helt senta i stap long ol ples longwe long tripela distrik long Hela i bin kamap long dispela trening program.

Dr Tati i tok amamas long komitmen bilong ol dispela helt woka long lainim ol nupela samting we ol i ken helpim ol belmama na ol mama i laik karim bebi.

Em i tok ol komyuniti helt woka, moa yet ol meri, i bin kisim sapot long man bilong ol na famili wantaim ol komyuniti. Dispela i bikpela  samting long pasin bilong ol Hailans olsem na i helpim ol long pinisim dispela trening program.”

“Invesmen long wanpela studen em i impoten, tasol invesmen long 13 helt woka bai kamapim bikpela senis,” Dr Tati i tok.

Mani bilong stretim gut ol bilding na ikwipmen long ol helt senta i bin kam long  Papua New Guinea-Australia Partnership, Hela PHA helt fanksen grent, sios patnasip na Koroba/Kopiago Distrik Divelopmen Atoriti.

Long taim ol i bin kirapim Hela PHA long 2016, Bot na Ekseketiv Menesmen Tim i luksave olsem ol i mas stretim ol helt senta na givim moa trening long ol helt woka long helpim ol belmama na ol mama i laik karim bebi. Ol i wokbung wantaim ol divelopmen patna long winim dispela mak.

Dispela wokbung i helpim Hela PHA long kisim mani bilong apgredim ol helt fesiliti, na tu ol i putim mani bilong baset long stretim wok bilong helt.

Ol i sainim tu agrimen wantaim ol sios helt fasiliti na distrik helt menesa long stretim gut ol haus na sanapim wanpela nupela haus karim wantaim ol rum we mama i ken karim bebi.