OL lain long nesenel museum bilong Papua Niugini i selebretim intenesenel museum de long Trinde 30 Jun.

Het tok bilong dispela de em “The future of museums- Recover and Reimagine.”  Dispela het tok i bilong soim olsem ol lain i kam bihain i mas save long wanem ol samting i bin stap bipo.

Dairekta bilong Nesenel Museum Dr Andrew Moutu i bin toktok long wok bilong bilum. Em i tok bilum i gat planti gutpela samting insait long en na wanpela bilong ol pasin bilong helpim wanpela na narapela.”

Em i tok  moa olsem bilum em i olsem ol man, bikos i gat maus bilong en, em i gat fran na baksait na tu em i gat lep na rait sait bilong en. Na tu bilum em i wanpela hap we pikinini i save stap wantaim ol mama.

Insait long dispela seremoni long nesenel Museum, ol lain bilong Japanese Embassy, British  High Commission na wanpela mausman bilong United Nation tu i bin kamap.

Astingting bilong ol lain long nesenel museum em i bilong skulim ol pikinini husat i kam bihain long save long wanem kain samting i bin stap bipo long taim bilong ol tumbuna.

Gavman i bin opim dispela Nesenel Museum na Art Galeri long 1975. I gat ol kaving na ol samting ol tumbuna long olgeta provins bilong PNG bin yusim i stap long dispela museum. I gat 30,000 antropoloji samting, 25,000 akioloji samting, 14,300 saiens samting, 20,000 samting bilong pait na 7,000 ol samting I stap bipo na nau tu.

Andrew Moutu i tok, “Dispela em i namba 9 yia long Nesenel Museum na Art Galeri bilong Papua Niugini long selebretim intenesenel museum dispela de. Ol i bin stat selebretim dispela bikpela de long 2012.

Samantha Solomon i raitim