ATONOMUS Bogenvil Gavman (ABG) wantaim bikpela sore i tokaut long indai bilong wanpela memba bilong ol Raymond Masono.

Mista Masono i bin stap memba bilong Atolls na Minista bilong Helt long ABG taim em i dai.

Presiden Ishmael Toroama i tok Mista Masono i bin givim tru laip bilong em long givim sevis long ol pipel bilong em, long gavman bilong Bogenvil na long God.

“Bikpela hap bilong profesenel laip bilong em, Mista Masono i bin wok long pablik sevis. Em i bin wanpela man husat i wok hat long bringim bek ol gavman sevis i go long Bogenvil long taim Bogenvil i stap namel long bikpela pait long ol yia long 1990 na kam antap,” Presiden Toroama i tok.

Mista Masono i bin wanpela gutpela wokman tru na em i bin wok olsem het bilong ol gavman dipatman na bihain ol i makim em olsem het bilong Bogenvil Pablik Sevis.

Long 2015 em i bin lusim pablik sevis na go long politik. Em i bin karim ol wok bilong em gut na I bin stap minister bilong sampela bikpela wok. Em i bin stap tu Vais Presien long las gavman.

Presiden Toroama i tok em i bin luksave long ol skil na pasin bilong Mista Masono na makim em long stap long kebinet bilong em. Olsem Minista bilong helt long gavman bilong mi em i bin wok hat long kamapim ol senis long helt sevis bilong mipela na em i bin go pas long ABG Helt Dipatmen long pait egensim COVID-19.

Long makim sore bilong ABG Toroama i tok em i wanbel pinis wantaim Praim Minista James Marape long surukim ol toktok bilong Joint Supervisory Body (JSB) i go long narapela taim.