WOK bilong kisim tingting bilong ol pipel long PNG i kamap Kristen kantri i pinis asde Trinde 30 Jun.

Siaman bilong Constitution Law Reform Commission (CLRC) Kevin Isifu i tok, “CLRC bai i no inap toktok moa o kisim moa sabmisen bihain long dispela taim.”

“Nau long dispela taim i go CLRC i wok long stretim na pinisim ripot bilong dispela wok na bai ol CLRC komisina i ken endosim na bai ol i ken givim long Praim Minista James Marape long Julai 16, 2021.

“Praim Minista Marape bai i tokaut long dispela ripot long palamen long taim ol memba i sindaun long palamen bung long mun Ogas, Mista Isifu i tok.

Dispela ripot bai i gat tupela hap bilong en. Namba wan hap i gat olgeta stori ol i kisim long ol konsaltesen ol i holim long kantri olgeta. Na namba tu hap i gat ol toktok ol i kisim long ol arapela ripot, ol buk na ol arapela tok i stap long pepa na tu ol rekomendesen.

“CLRC bai i no kisim sait bilong wanpela grup. Em bai i stap namel na em i no inap mekim disisen long ol hap hap toktok na rekomendesen. Em i skelim gut olgeta toktok long painim wanpela rot we i tingim wanem kain ol samting i ken kamap long demokresi, human rait, PNG kastom na tumbuna pasin, na tu Kristen rilijen na ol arapela rilijen na bilip,” Mista Isifu i tok.

Dispela inkwairi i bin stat long 23 Epril 2021. CLRC i bin go long olgeta hap long PNG long harim tingting bilong ol pipel. Na em i bin go long Bogenvil tu long Me 2.

Em i bin mekim dispela wok namel long taim nogut bilong COVID-19.

Mista Isifu i tok maski COVID-19 pandemik i stap, na tu ol i bin sot long taim na mani, ol i bin inap long go bung wantaim ol pipel na kisim tingting bilong ol pipel. Sampela dispela ol pipel em ol ki stekholda, ol mausman na mausmeri bilong ol sios, ol meri na yut grup, ol sivil sosaiti na ol bisnis haus. Ol i bin bung tu wantaim ol skul, ol provinsal edministresen na gavman na ol politikel lida na ol pablik.

Insait long ol konsaltesen ol i bin kisim tu ol sabmisen ol grup i raitim long pepa na givim.

CLRC i luksave tu long ol wari na sut toktok i kamap long ol arapela pletfom olsem long CLRC Facebook, website na long ol nius midia.