WANPELA bikpela hevi bilong kantri em sindaun bilong ol misineri tisa husat i save bringim kwaliti sevis long kantri tasol no gat gutpela luksave na sapot bilong Dipatmen ov Edukesen.

Kardinal Sir John Ribat i bin mekim dispela tok long taim Minista bilong Haia Edukesen, Risets Saiens na Teknoloji (DEHERST) na Spot, Wesley Raminai wantaim seketeri bilong DHERST Dokta Francis Hualopmomi i bin go bung wantaim Katolik Bisops Konprens (CBC) bilong Papua Niugini na Solomon Ailan long las wik Fraide.

Kardinal Ribat i bin tok klia long Minista Raminai olsem planti misineri tisa husat i bin givim planti yia long givim gutpela sevis long PNG, i bin lusim kantri bikos Nesenel Edukesen Dipatmen i no lukautim ol gut.

Mista Raminai i bekim tok bilong Kardinal Ribat olsem em bai toktok wantaim wanwok bilong em Edukesen Minista na lukluk long stretim dispela bikpela hevi.

Seketeri bilong DHERST, Dokta Hualopmomi i tok olsem DHERST nau bai wok long trensfe bilong pablik tisa edukesen koles na institusen na ol sios institusen tu.

Ol CBC askim olgeta i mas toktok moa long dispela hevi na patnasip hevi bilong sindaun long ol minisneri tisa, edukesen na helt kea long kantri.

Dispela bung em gutpela bilong Minista Raminai long lukim na save long ol wok ol sios i save wokim long kantri.