PRESIDEN bilong Papua Niugini Tribal Foundation, Gary Bustin, i tok ol pipel long Papua Niugini i no save lukim vailens olsem em i wanpela bikpela samting. Em i tok long taim vailens i kamap ol i save lukluk na larim tasol.

“Ol pipel long PNG i no ting vailens em i bikpela samting. Taim ol i lukim vailens i kamap namel long tupela marit ol i save tok em i hevi bilong tupela marit na taim i kamap long komyuniti o long sampela lain ol i save tok em i no hevi bilong mipela, mipela i no inap long subim nus long hevi bilong ol arapela,” Bustin i tok.

Em i tok dispela pasin i kamap bikos tolorens mak bilong vailens long ol pipel long Papua Niugini i antap tru.

Dispela i min olsem ol pipel long Papua Niugini i no lukim vailens olsem em i bikpela samting moa. Ol i lukim olsem em i nomol na taim vailens i kamap klostu long ol o insait long komyuniti, ol i no guria o pret, nogat, ol i lukim vailens i kamap stap, tasol ol i no bisi. Mak bilong dispela pasin bilong i no bisi long vailens i antap tru long PNG.  

Bustin i mekim dispela tok long wanpela bung we i ol i toktok long ol hevi bilong lo na oda na jastis long kantri. Sampela bilong ol dispela hevi  em GBV insait long marit, soseri riletet vailens (SARV) na ol pasin nogut i kamap long ol meri, traibel pait o grup pait long komyuniti, ol stil pasin i kamap long solwara, ol kalabus i brukim banis na ol arapela hevi insait long politiks na long mani bilong kantri.

“PNG nau i sot long gutpela pasin na lidasip olsem na tolorens mak bilong yumi long GBV na SARV em i bikpela tumas. Wanem pasin nogut yumi lukim na i no stopim, bai em kamap bikpela tru,” Bustin i tok.

Em i givim tok piksa long wanpela stori i kamap long National niuspepa i no long taim i go pinis. Niuspepa i putim piksa bilong wanpela meri ol i hangamapim na kukim em bikos long SARV. Long dispela taim i kam inap nau, em i tok, ol i no holim yet ol lain husat i mekim dispela pasin nogut na kalabusim ol. Ol i no bisi tu olsem vailens i bin kamap long dispela meri.

Rebecca Negere i raitim