OL Sivil Sosaiti Ogenaisesen (CSO) i paul long wanem wok Femili na Seksual Violens Asalt Komiti (FSVAC) i save mekim na wanem wok bilong Jenda Beis Vailens Nesenel Sekreteriet (GBVNS) bikos ol i tok tupela i wankain tasol.

Insait long wanpela bung i kamap long Pot Mosbi, maus meri bilong ol CSO na Program Kodineta bilong Magna Carter PNG, Shirley Gabriel i tok gavman i save laik long kamapim ol nupela projek tasol ol i no laik long sapotim ol projek we i kamap na i stap pinis.

“Gavman i kamapim Jenda Beis Vailens Nesenel Seketeriet taim FSVAC i stap pinis, na nau mipela ol CSO na ol pipel i paul long wanem wok FSVAC i bai mekim na wanem wok GBVNS i bai mekim bikos tupela wantaim i mekim wankain wok,” Shirley i tok.

FSVAC i bin kamap long 2000 na em i wanpela sektoral komiti aninit long Konsaltetiv Impimentesen na Monitaring Kaunsil (CIMC). Bikpela tingting bilong FSVAC em long kamap namba wan nesenel bodi we bai lukluk long stretim ol hevi bilong ol famili na seksual vailens.

Na GBV Nesenel Sekreteriet em i wanpela nesenel strateji long stopim na rispon long jenda beis vailens na bikpela tingting bilong en long pinisim GBV bihainim driman bilong gavman long visen 2050. Dipatmen bilong Komyuniti Divelopmen na Rilijen bai go pas long lukautim dispela nesenel streteji bilong pinisim GBV long kantri.

Shirley i askim Jastis Minista Bryan Kramer husat i stap insait long dispela bung tu long lukluk long dispela na kliaim tingting bilong ol CSO.

Rebecca Negere i raitim