GAVANA bilong Oro, Garry Juffa i wanbel long disisen bilong kot long stopim Musa/ Pongani Logging Company.

Popondetta Distrik Kot i bin givim oda long ol papagraun long stopim Musa Fura Company, Musa Century Ltd na Musa Valley long katim ol diwai long hap na ol sip bilong karim ol diwai inap 90 de na ol i mas stretim tok wantaim ol papagraun.

Mista Juffa i tok em i sapotim ol papagraun long wanem tok ol i mekim na ol bai kisim sapot bilong lo wantaim provinisal gavman bilong ol.

Gavana Juffa i tok,“Mipela i gat wok long lukautim ol diwai bilong mipela. Em i wanpela hap we ol pipel bilong Oro bai kisim sevis long en, na tu em i bilong Papua Niugini.”

 “Ol lain husat i wok long katim diwai bilong kisim mani i mas planim nupela diwai na ol i mas katim ol bikpela diwai tasol. Sapos ol i no mekim olsem na i katim nating ol diwai samting, bai yumi no ken wok wantaim ol,” Gavana Juffa i tok.

Gavan Juffa i tok em bai painim ol rot bilong rausim ol kain lain olsem. Em i tok sampela kampani i no kam long rait wei na ol i mekim agrimen wantaim sampela papagraun na i no bihainim lo na ol i kam katim ol diwai.

Ol kampani kain olsem Collingwood long Wanigela em i yusim tok orait  em i no bihainim lo na kisim we Provinsal Forest Management Committee i no tok orait long en tu. Narapela man i bin raitim Signature bilong Administartor bilong Oro long dispela kampani i ken go insait.

Edministreta Trevor Magei i ripot long polis na ol frod skwat bilong Oro i bin arestim wanpela wokman bilong PNG Forest Authority .

Gavan Juffa i tok, “ Ol diwai bilong Oro i gat velu na bai kisim ol bikpela lain patna long wok wantaim bilong givim mani i go bek long provins. Ol i no ken kisim ol lain bilong bagarapim ol gutpela diwai bilong ol.