TRANSPARENCY International Papua Niugini (TIPNG) i holim Enual Jeneral Miting bilong en na i givim ol ripot bilong 2020.

Ol fainensal memba bilong TIPNG i makim Peter Aitsi olsem Siaman, Michelle Hau’ofa olsem seketeri na Akae Beach olsem tresera long mekim wok long yia i kam. Ol i makim narapela 11 moa memba long mekim wok insait long dispela bod tu.

Siaman Peter Aitsi i tok, em i amamas long ol wok ol dispela nupela memba i bai mekim insait long bod.

 Bikpela wokmak bilong bod em long lukluk long gavanens bilong ogenaisesen na strongim rilesensip bilong asosiesen wantaim ol praivet na pablik sekta. Dispela rilesensip em i bikpela samting long dispela taim we maus bilong ol sivil sosaiti i go daun tru na korapsen i kamap bikpela long kantri.

“Dispela nupela bod bai lukluk long strongim sampela ol ki praioriti olsem givim sapot long kamapim strongpela Independen Komisin Egens Korapsen (ICAC). Narapela praioriti nau yet em long karim aut skul bilong ol lain husat bai givim vot na apim edvokesi bilong gutpela menesmen na pasin bilong 2021 ileksen integriti. Bikpela lukluk bilong mipela i stap long strongim ol sitisen long tok nogat long korapsen na daunim les pasin bilong pablik,” Mista Aitsi  i tok.

“TIPNG i kamapim ol nupela tingting insait long stretejik plen 2019-2023 long kamapim strongpela na ektiv patnasip. Taim planti lain i bungim han na mekim wok bai strongpela senis  i kamap. Mipela i pas pinis wantaim ol wan wan lain na ogenaisesen husat i gat wankain tingting olsem mipela long opim anti-korapsen netwok long kantri,” Em i tok.

Ol wok bilong ol dairekta long TIPNG em i volantari na ol dairekta bai no inap long kisim pe. Ol bod i gat wokmak long kamapim driman bilong ogenaisesen, strongim astingting bilong ogenaisesen, menesim fainensal pefomens, bihainim lo bilong gavman na lukluk long pefomens bilong TIPNG.