PALAMEN bilong Papua Niugini i abrusim wok bilong sek na balens long wok bilong em, Opis bilong Katolik Bisop Konprens (CBC) bilong Papua Niugini na Solomon Ailan i tok.

Jeneral Seketeri bilong CBC, Pater Giorgio Licini, i tok kain wok we palamen i sindaun sotpela taim na surukim de i go longpela taim bipo long narapela kibung, i no stret.

Em i tok sapos dispela kain sindaun i kamap, ol pipel i no inap save sapos gavman i ran gut o nogat.

Em i mekim dispela tok long taim we palamen i wok long sindaun long sotpela taim tasol na i no long tupela o tripela wik.

Las kibung em palamen i bin kamap long 20 Epril na ol i surukim de bilong narapela kibung i go long 10 Ogas. Dispela em klostu foapela mun.

Aninit long Palamenteri Stending Oda, palamen i mas holim inap long 165 de bilong kibung long wanpela yia.

Wantok Niuspepa i salim tok long Palamen long save long hamas de palamen i bin kibung pinis na amamas de i stap yet, tasol i no bin kisim wanpela bekim.

“Long ol sampela kantri, i no gat wanpela man i mas pasim wok bilong palamen,” Pater Giorgio i tok.

“Long hia na ating i mas wankain long Australia na Inglan we i gat ol de palamen i mas bung.

“Gavman i save hamas de palamen i mas kamap na holim ol kibung.

“Ol pipel i mas ranim gavman, i no long narapela wei we gavman i ranim ol pipel.

“Dispela i bihainim Mama Lo we i tok long gavman i bilong ol pipel, kamap long ol pipel na ol pipel yet i gavman.

“Kain mak we palamen i wok long ran i no bihainim dispela tok.

“Palamen oltaim i mas bung na toktok long ol bikpela tok o wok divelopmen i laik kamap.”

Pater Giorgio i givim piksa long tok bilong kamapim casino indastri i kam long kantri.

Em i tok palamen i mas dibet long dispela tok bipo long Nesenel Geming Bod i kamapim dispela indastri.

Em i tok PNG palamen i gat wanpela semba tasol.

Em i tok dispela i lukim wanpela lain tasol i vot na kamapim ol lo. I no olsem long Australia o long ol arapela kantri we bipo long wanpela tok i kamap lo, tupela semba i mas vot long en pastaim.

“Wei we wok bilong PNG palamen i wok long kamap, em i kisim gutpela malolo.

“No gat wanpela sek na balens i stap long save sapos em i wok gut o nogat.

“Praim minista na ol minista i wok long kisim olgeta pawa, i no ol pipel olsem lo i tok.”

Paul Zuvani i raitim