TAVURVUR maunten paia klostu long Rabaul, Is Nu Briten inap pairap gen long sampela taim bihain, bosman bilong haus guria long Rabaul, Ima Itikarai i tok.

Em i givim tok lukaut long taim planti ol wok divelopmen i wok long kamap long Rabaul taun.

Em i tok ol bisnis olsem supamaket, hadwe haus na ol arapela bisnis i stap insait long Rabaul taun i no ken tingting tumas long sanapim ol haus.

Em i tok husat manmeri o bisnis i laik wokim bisnis long Rabaul taun i mas tingting gut pastaim bipo long ol kirapim wok bisnis bilong ol.

Em i tok nogut maunten paia i pairap gen na bagarapim wok bilong ol.

Itikarai i tok ol i save long histori bilong Rabaul olsem Maunten Tavurvur i bin pairap tripela taim pinis na bagarapim planti samting.

Em i tok long rekot ol i save olsem Maunt Tavurvur i bin pairap long 1878, namba tu long 1937 na namba tri long 1994.

“Dispela ol rekot i soim olsem Maunt Tavurvur i wok long pairap na bai pairap gen long bihain taim gen,” Itikarai i tok.

“Ol ripot bilong wok panimaut na infomesen mipela i kisim i soim olsem bihain long 46 krismas Maunten Tavurvur i pairap.”

Mista Itikarai i tok manmeri i mas redi na kisim was taim ol yia i kamap klostu long dispela mak.

Em i tok Rabaul taun i wok long lukim planti wok divelopmen i kamap we Is Nu Briten Provinsal Gavman i brukim tripela hap bilong Rabaul taun long kirapim wok divelopmen.

Em i tok dispela ol wok divelopmen bai kamap long kokonas prodak i go long Rabaul Hotel, long Rabaul Hotel i go long Kaivuna Hotel na namba tri hap i stat long Kaivuna Hotel i go long Rapindik ples balus.

Em i tok ol lain husat i laik kamapim wok namba wan hap i mas tingting gut bikos dispela i hap  bikpela bagarap i save kamap taim maunten paia i pairap.

Em i tok provinsal gavman i tok long kamapim ol wok divelopmen long ol ples we bagarap inap kamap isi.