KAUN long Mosbi Not-Wes bai-ileksen i wok long go het.

Ol I bin stopim wok bikos ol kendidet i kisim dispela wok i go long kot.

I bin gat paul tok i stap long wanpela balot bokis long wod 10.

Ol skrutinia i tok wantaim dispela tok na ol arapela paul tok long no gat stretpela sain bilong ol prisaiding opisa long ol balot pepa na ol i skrutinia i no bin inap long stap long olgeta foapela kaunting senta long Hanuabada, Murray Bareks, Sir John Guise Stedum na Edministresen Koles.

Ol I tok long ol dispela as, kaunting i mas stap.

Tasol long Tunde, Nesenel Kot i rausim dispela kot bikos em i tok nau i no taim long pasim kaun long taim kaun i stap long kain mak olsem kwaliti sek.

Em i tok sapos ol kendidet i gat hevi, ol i ken kamapim bihain long kaun i pinis long Kot bilong Disputet Ritens.

Long nau yet, Pangu pati kendidet Lohia Boe Samuel i kisim 17,005 vot, Joe Tonde i kisim 8084, Dokta Thadeus Kambanei i kisim 5548 vot na Samuel Parkop i kisim 5530 vot.

Anna Kavana Bais husat i wanpela meri kendidet tasol i kisim olsem 2857 vot.

Inap long nau PNG Ilektoral Komisin i kaunim pinis 57,550 alowebel balot pepa insait long 135 balot bokis.

Mosbi Not-Wes Ritening Opisa, Desmond Timiyaso i tok total alawebel vot em 87,475 na kendidet husat i kisim 28,000 vot o 57+ pesen bilong vot bai winim sia.

Ol 42 kendidet i resis long dispela bai-ileksen.

Ilektoral Komisin i bin yusim K3 milien long dispel holim bai-ileksen.

Bai-ileksen i kamap bihain long Sir Mekere Morauta i dai long Novemba long las yia.

Dispela bai las ileksen i kamap bipo long PNGEC i redi ol wok bilong 2022 Nesenel Jeneral Ileksen bai kamap long Epril 2022.