ROYAL Papua Niugini Konstabuleri i kamapim histori long Tunde taim ol i putim tupela meri go insait long Polis Promosen Bod. Bipo dispela bod i save gat tripela memba tasol.

Sinia diplomat na pablik sevan bipo, Dame Jean Lucilla Kekedo i kisim wokmak olsem Siameri bilong Polis Promosen na Apoinmen Bod 2021.

Narapela memba bilong bod em Ekting Deputi Polis Komisina Edministresen, Joanne Clarkson. Em i makim maus bilong polis komisina. Na asisten Komisina bilong Hailans Isten end, Anton Billie tu i kamap memba bilong Polis Promosen Bod. Em i makim maus bilong Polis Yunion.

Polis Komisina David Manning i tok dispela em i namba wan taim bilong Polis Promosen na Apoinmen Bod i gat ol meri insait long en.

Polis Minista William Onglo i tok tenk yu long Mis Kekedo i wanbel long kisim dispela wokmak na em i strongim ol PPB memba long mekim gutpela wok.

Minista Onglo i amamas long Komisina Manning long bilip long ol meri i ken kisim ol wokmak we ol man tasol i save holim bipo.

Mis Kekedo i tok tenkyu long Minista Onglo na Komisina Manning long gutpela tingting long mekim ol apoinmen. Em i tok promis long mekim gut wok bilong en bikos em i tok em i no namba wan taim bilong en long pablik sevis promosen na apoinmen wok.

Klostu taim bai ol PPB i bung long mekim ol promosen bilong 2021.