OL pipel long Sankiang viles, long wod 6 bilong Usino LLG long Ramu veli, i  save bungim hevi long painim gutpela wara saplai long dring, kukim kaikai na waswas long taim bilong san.

Tasol dispela hevi nau bai no gat bikos gutpela wok i kamap pinis long bringim fres, klin na helti wara saplai long maunten i go daun long ples bilong ol.

Usino- Bundi distrik divelopmen atoriti (DDA) i bin givim moa long K300,000 helpim mani i go long wanpela lokal kontrakta long kamapim viles wara saplai projek long Sankiang na dispela wok bai klostu i pinis nau.

Dispela projek bai i helpim tu ol pipel long ol viles na haus-lain komyuniti husat i stap arere long Ramu Suga taun na Ramu agri indastris.

Memba bilong Usino-Bundi na Edukesen Minista, Jimmy Uguro i tok em i wok bilong gavman long bringim kain besik sevis olsem wara saplai long helpim pipel na em i amamas olsem projek i kamap gut long ples Sankiang.

Em i tok Usino-Bundi DDA i luksave long arapela bikpela viles long kunai eria long Ramu veli olsem Bora na Bumpirupun bai kisim wankain helpim long bihain taim.

Wod 6 memba bilong Sankiang, Francis Tari, i mekim bikpela tok amamas long DDA long kamapim dispela wara saplai projek we ol pipel long ples i nidim tru.

Em i tok ol arapela MP long bipo i no bin luksave long krai bilong ol pipel bilong Sangkiang.

“Dispela kain helpim olsem besik sevis olsem wara saplai long helpim pipel bilong mi i soim olsem MP Uguro em wanpela trupela lida husat i gat gutpela tingting long helpim ol pipel long rural ples,” Tari i tok.

Em i tok kain nid bilong ol Sangkiang pipel i bin stap longpela taim tru pastaim na bihain long PNG i kisim independens tasol no gat ol MP ol pipel i votim i bin lukim save na helpim.

James G. Kila iraitim