NU Ailan Provinsal Asembi i kamapim wanpela Asembli Inkwairi Komiti.

Dispela komiti bai stap olsem Was Dok (Watch Dog) long skelim na glasim wok na stap bilong ol lida bilong provins.

 Sapos ol i asua komiti bai putim ripot bilong ol long ol ogenaisesen olsem Polis Frod Skwat o Ombudsmen Komisen long mekim wok painimaut.

Asembli Inkwairi mosen i bin namba wan bisnis long Haus ov Asembli we planti ol memba i bin kamap long kibung na vot long em.

Asembli Inkwairi Komiti bai op na kisim wari bilong ol pipel long ol samting we provinsal gavman, moa long ol samting we i no kamap gut aninit long lo bilong kantri na provinsal gavman.

Lida bilong Gavman Bisnis na Siaman bilong Lo na Oda Komiti, Edwin Maingen, i tok komiti bai gat pawa long askim ol man na meri husat sut toktok i stap long ol long ol i mas kamap na givim toktok bilong ol.

Mista Maigen i tok sampela ol sut tok i stap long rot bilong baim ol samting, long kisim graun, long kisim na yusim pablik mani o long kisim ol wok manmeri long wok.

Em i tok nau yet planti ol sut i wok long kamap bilong ol rot we opisa i kisim mani long Distrik Sevis Impruvmen Program (DSIP) aninit long nem bilong liklik i go long namel sais bisnis (SME) tasol i yusim long narapela ol samting.

“Mipela i lukim ol pasin i wok long kamap na i luksave olsem sampela em ol opisa i yusim long baim vot bilong ol yet o long ol husat ol i wok long ol,” Maingen i tok.

Inkwairi Komiti i gat Saimeri em Getrude Salir na ol arapela bod memba em John King Pawut, Valentine Betbet na Patrick Toabusai.

Narapela Nu Ailan Lejisletiv Asembli bai kamap long 8 Septemba.