BIHAIN long 6-pela yia Sentral Provinsal Gavman i makim ol bod memba bilong Smol Kraf Ekt.

Wok bilong dispela bod em long lukim olsem olgeta bot namel long 3-10 mita husat i operet long solwara bilong Sentral Provins, i mas rejista.

Seremoni bilong ol bod memba I mekim promis bilong ol i bin kamap long Loloata Resort na bihain tasol dispela bod i statim wok bilong en.

Wanpela woksop i kamap long givim trening long ol bod memba na wanem kain wok ol bai mekim.

Ekting Deputi Provinsal Edministreta bilong Sentral, Glen Gabi Gani i tok provinsal gavman i bin traim long mekim dispela wok na nau em i kamap tru bihain long 6-pela yia.

Em i mekim dispela tok long taim Nesenel Maritaim Sefti Atoriti (NMSA) Smol Kraf Ekt implementesen program Kodineta Ishmael Kawi na NMSA opisa bilong Sauten rijon Sylvia Kivali i bin stap.

Kawi i tok Smol Kraf Ekt i bin stat long 2015 long 15 nambis provins tasol Sentral provins i no bin statim dispela wok.

“Mipela i amamas olsem Sentral provins nau i gat bod olsem na mipela i holim dispela woksop long givim trening long wok bilong inspeksen,” Kawi i tok.

Em i tok wok bilong Smol Krap Ekt i stap long han bilong 15 provins wantaim Bogenvil.

Ekt i tok ol nambis provins i mas gat 5-pela bod memba na rejistri opis we rejistresen bilong ol bot bai kamap long mak bilong Ekt. Ekt bilong NMSA i makim K250 rejistresen long tripela yia na laisens long wanpela yia.

Ol bot bai i gat laisens aninit long foapela kain grup bai kraf i ken yusim. Bot i ken rejista aninit long pasindia long karim ol pasindia na narapela em i bilong kago na painim pis tasol.

Rejistresen fi bilong ol em NMSA i bin makim pinis em K250 long kain kain yus olsem bilong kisim pasindia em K250 na bilong kago na kisim pis em K150.

Wok bilong ol Provinsal bod memba bilong Smol Kraf Ekt em i bilong lukim olsem ol fi i no ken go antap tumas long fi NMSA i bin makim na ol i mas kisim olgeta fi long provins na i no long NMSA hetkwata.

Tupela provins tasol, Galp na Madang i no gat ol bod memba yet long ol provins bilong ol.

Joseph Dawai i raitim