ATONI Jeneral na Seketeri bilong Dipatmen bilong Jastis na Atoni Jeneral (DJAG), Dokta Erik Kwa i tok dipatmen bilong en i kamapim pinis wanpela bil ol i kolim Kontrol Sabstens Bil na i wetim gavman long givim tok orait long Palamen.

Em i tok tupela mun i go pinis, gavman i bin givim tok orait long ol i mas kamapim dispela Kontrol Sabstens Bil. Ol i painim olsem lo bilong drag insait long kantri i olpela na i no strong tumas long kotim ol lain i kamapim ol nupela kain pasin bilong kisim ol drag i kam insait long kantri.

“Dispela em i wanpela impoten lo bikos dispela lo bai opim rot long mipela i ken stretim ol kain kain hevi bilong drag insait long Papua Niugini,” Dokta Kwa i tok.

Em i tok, sampela mun i go pinis i bin gat keis bilong ol ovasis man i kisim drag ol i kolim kokein i kam insait long kantri. Tasol long dispela taim kantri i no gat ol strongpela lo long stretim dispela keis na arestim ol man husat i bin mekim dispela pasin.

“Mipela i no bin mekim planti arest na kotim ol lain husat i stap insait long dispela hevi bilong kokein. I no bin gat lo long kotim ol lain husat i holim kokein na husat i karim i go i kam. Olsem na dispela nupela Kontrol Sabstens Ekt bai lukautim dispela eria,” Dokta Kwa i tok.

Em i tok long taim Palamen i givim tok orait, bai dispela nupela lo i givim pawa long Nakotiks Bod i yusim saiens long lukim sapos wanpela drag i gat planti posin o nogat na olsem wanem lo bai mekimsave long ol lain husat i yusim drag o karim drag i go i kam na wanem kain drag ol i yusim.  

Rebecca Negere i raitim