WANPELA tim bilong Noten Mobail Grup (NMG) bilong Goroka i soim trupela pablik rilesens (PR) wantaim komyuniti klostu long Widar long las wik pastaim long wanpela bikpela gavman delegesen i bin go long lukim Pasifik Marin Indastrial Zon (PMIZ) eria.

PMIZ em wanpela projek bilong gavman long Widar long not kos rot (NCR) long Madang distrik long kamapim ol indastrial eria we ol bisnis na indastri i ken kamap. Tasol dispela plen bilong gavman i go popaia na wok i no kirap yet na em bus i karamapim bikpela eria.

Las wikTresera Ian Ling-Stuckey wantaim Fiseris Minista Dokta Lino Tim na Menesing Dairekta bilong Nesenel Fiseris Atoriti (NFA) wantaim sampela sinia gavman opisa i bin lukluk raun long PMIZ projek eria.

Dispela wokabaut i lukim bikpela polis eskot, na tu ol bikpela lain kar i ran i go long hap. Tasol pastaim long ol i go long hap wanpela tim bilong NMG (Noten Mobail Grup) polis i sambai pinis long Widar.

Tupela memba bilong NMG, Robert Wilson na Boski i bin pas na sekim eria na luksave olsem no gat birua long hap na bihain long en em konvoi bilong gavman delegesen i bin go.

Bihain long ol i sekim gut eria long PMIZ ol i go na sambai long rot na baim kulau na stori wantaim ol tebol papa na tebol mama.

James G. Kila i raitim