DIPATMEN bilong Koreksenel Sevis CS i bungim planti bikpela salens na wanpela bilong ol dispela salens em planti kalabus i save brukim banis na ranawe.

Minista bilong Koreksenel Sevis, Win Bakri Daki, i mekim dispela tok long taim ol Koreksenel Sevis Opisa i bin pas aut long Bomana.

“Long dispela krismas tasol ol kalabus i brukim banis na ranawe moa long 4-pela taim. Dispela kain samting i no save kamap bipo,” Minista Daki i tok.

Em i tok, dispela i soim olsem ol woda i les long mekim wok bilong ol.

“Ol woda i wok long slek na i no stap stret na mekim gut wok olsem na dispela pasin i kamap.

Minista i tok gavman i nau stap long presa long skelim ol risos olsem taim, mani na ol wokman i go i kam. Em i tok ol dispela risos inap long go long ol arapela bikpela hevi.

“Olsem na mi laik strongim yupela ol nupela greduet long givim namba wan strong bilong yupela long kantri. Mipela i nidim yupela.

“Yupela bai mekim bikpela samting long divelopim kantri. Divelopmen i no bilong bildim ol bikpela mani infrastraksa tasol. Divelopmen em long kamapim gutpela, seif na fri envairomen long ol bisnis i kamap.

“Dispela i bai kamap sapos yu lukautim ol lain brukim lo, helpim ol na givim ol hop long kamapim nupela gutpela laip,” Minista Daki i tok.

Em i tok taim ol kalabus i pinisim taim bilong ol na i go aut olsem ol nupela man o meri, komyuniti bai no inap moa long pret long ol. Ol bai painim sans long mekim gutpela samting long laip bilong ol na ol pablik bai fri long wokim bisnis na kamapim divelopmen long kantri.

Rebecca Negere i raitim