GAVANA bilong Morobe Provins, Ginson Saonu i givim tok orait long ol polis i arestim wanpela saspek husat i bin bagarapim nem bilong em long sosel midia.

Ol polis i arestim dispela saspek long Pot Mosbi bihain long ol toktok dispela saspek i mekim long sosel midia long Gavana Saonu planti taim. Ol i arestim em aninit long lo bilong saiba difemesen, saiba haresmen na saiba buling. Ol dispela em ol bikpela kraim aninit long Cybercrime Code Act 2016.

Gavana Saonu i tok dispela arest i putim mak we ol pipel i no ken mekim kain kain toktok we i no tru na i ken bagarapim nem bilong ol lida.

“Dispela arest bai givim tok lukaut long ol pipel husat i save mekim nabaut long sosel midia olsem Facebook,” Gavana Saonu i tok.

Gavana Saonu i tok welkam long ol gutpela tokpait na ol gutpela tingting long strongim divelopmen long provins.

“Bai mi larim lo i mekim save long en long nau.”