NESENEL Statistikal Opis (NSO) bai no gat Nesenel Populesen na Hausing Sensus long 2021, wanpela opisa bilong em i tok.

Opis bilong NSO i no ran gut na i no redi long statim wok long neks mun.

Em i mekim dispela tok long taim Wantok Niuspepa i askim long wanem taim sensus bai stat.

“Mipela i pasim olgeta tok bilong kamapim Sensus stat long Epril i kam.”

“NSO ino tok tru long gavman na ol pipel bilong Papua Niugini long kamapim sensus long Julai 12 i go inap long Julai 23.

“NSO i pret long dispela na i no tokaut yet long gavman long dispela sindaun.

Em i tok NSO nau i wok long redim wanpela sabmisen long givim long Nesenel Ekseketiv Kaunsil (NEC) na Praim Minista James Marape long tokaut long hevi bilong em.

Em i tok NSO bai askim Nesenel Plening Minista Renbo Paita long singautim wanpela konprens long surukim sensus i go long narapela yia.

Populesen sensus i save kamap bihain long 10-pela yia na las sensus i mas kamap long 2020 tasol dispela i no bin kamap bikos long hevi bilong mani.

I gat bilip Papua Niugini nau i gat namel long 8 na 9 milien manmeri.

Dispela namba em gavman bai tokaut stret bihain long 2021 Nesenel Populesen na Hausing Sensus i kamap.

Gavman i bin makim K100 milien long ranim dispela sensus.

Tasol dispela i sot bihain long Nesenel Statistikal Opis (NSO) i bin askim long K190 milien.

Ol las taim we kantri i bin holim ol nesenel sensus em long 1980, 1990, 2000 na 2011.

Bipo Minista bilong Nesenel Plening na Monitering, Richard Maru, i tok las Sensus (Census) opis i ranim i bagarap.

Em i tok kantri i mas kamapim gutpela sensus long save hamas manmeri i stap olsem gavman i ken plen gut na karimaut gut ol wok bilong em.

Em i tok kain hevi i save kamap taim ol i mekim ol ken las minit wok.

 “Ilektoral rol i kamap tupela wik bipo long mipela i bin go insait long ileksen na mipela i no gat taim long lukim kain sindaun i kamap gen.”

Ekting Nesenel Stetisisen, John Igitoi pastaim i bin tokaut olsem gavman i makim K100 milien long ranim sensus.

“Tasol dispela i no inap holim mipela bek long kamapim gutpela sensus,” Igitoi i tok.

“Mipela bai yusim ol rot i stap pinis long holim sensus.

“Samting mipela i laikim em gavman i mas givim mani hariap long skruim ol program mipela i gat long redim mipela yet long sensus.”