TIM bilong wol envairomen long dispela yia em “Ecosystem Restoration”. Dispela em i min olsem em taim bilong banisim ol hevi i bagarapim  ikosistem o envairomen na stat long painim ol rot bilong kamapim gut envairomen.

Long Is Sepik, program bilong European Union, “Sapot long rurel bisnis, invesmen na tred” (EU-STREIT) i bin mekim kempein long moa long 500 sumatin long Yangoru Sekenderi Skul long Fonde las wik.

Astingting bilong dispela em long skulim ol yangpela long rurel eria long save long veliu bilong netsa na envairomen. Bai ol i ken kontribut long lukautim na kamapim gut bek ikosistem.

Dispela bung i bin kamap long taim bilong namba wan inlen pis faming trening i bin kamap long Yangoru stesin. Ol 15 lokal man na meri tu i bin kamap long dispela selebresen.

Fiseris em i wanpela bilong tripela fud veliu sein EU-STREIT i wok long sapotim wantaim kakao na vanila. Ol dispela bai apim sastenabel na ikonomik divelopmen long rurel eria long Sepik rijon.

EU-STREIT Program kodineta, Dokta Xuebing Sun, i tok klia long bikpela bagarap i kamap long ikosistem long wol bikos long polusen na ol arapela ektiviti ol manmeri i save mekim i kontribiut i go long dispela bagarap.

Em i tok i gat bikpela nid long stretim dispela hevi long gutpela sindaun bilong ol pikinini long taim bihain.

Skul prinsipel, Lucy Gavalalu Silum, i bin strongim ol sumatin wantaim ol rot bilong stretim ol hevi i kamap long ikosistem olsem polusen long wara na pasin bilong katim ol diwai long ol wan wan eria bilong ol.

Ol sumatin i bin mekim kuis bilong ikosistem bilong planet na ol arapela hevi we i toktok long lukautim envairomen.

Carolyne Ketsimur i raitim