OL skrutinia bilong ol kendidet husat i resis long Mosbi Not-Wes bai-ileksen i askim Ilektoral Komisin long pasim wok bilong kaunim ol vot.

Ol i mekim dispela askim long Ritening Opisa, Desmond Timiyaso, long taim Komisin i redi long mekim ol kwaliti sek na eliminesen kaun long Sentral Kaunting Senta long Sir John Guise Stedium.

Em i tok em i no inap long pasim wok bilong kaunim vot bikos wok bilong ileksen i mas go het.

Em i tok em bai pasim ileksen taim em i kisim wanpela oda i kam long ol kot long sut toktok bilong paul pasin.

Long asde ol i bin statim ol wok bilong kwaliti sek.

Olgeta praimeri kaun long tripela kaun senta long Sir John Guise Stedum, Hanuabada na Murray Bareks i pinis long Mande apinun.

PNG Ilektoral Komisin bai kisim ol writ i go bek long Gavman Haus long 24 Jun.

Long nau yet Pangu Pati kendidet, Lohia Boe Samuel, i go pas wantaim 17, 006 vot na namba kendidet i ran bihain em Pipels Leba pati kendidet Joe Tonde wantaim 8,855 vot na Independen kendidet Dokta Thaddeus Kambanei wantaim 5000 vot.

Totel alawebel balot pepa bilong vot em 57,550.

Wanpela meri kendidet tasol Anna Kavana Bais i kisim olsem 2,000 vot.

Inap long 42 kendidet i resis long dispela sia bilong Mosbi Not-Wes.

Ilektoral Komisin i yusim K3 milien long holim Mosbi Not-Wes bai-ileksen.

Bai-ileksen i kamap bihain long Sir Mekere Morauta i dai long Novemba long las yia.

Dispela bai las ileksen i kamap long taim bilong dispela palamen.

PNGEC bai mas redim ol wok bilong 2022 Jeneral Ileksen.