NOMAD Rurel Lokal Level Gavman (NRLLG) bai i no inap stap aninit long Midel Flai Ilektoret olsem bipo.

Dispela disisen ol i bin kamap sotpela taim i go pinis long LLG mas kisim ful fanding na sapot bilong gavman aninit long lo.

Fesiliteita o man husat i go pas long dispela muv em Not Flai Open MP na strongpela oposisen man, James Donald.

Donald i tokaut olsem longpela taim tru Middel Flai na Not Flai ilektoret i bin yusim ol olsem politik na edministresen graun tasol no gat wanpela bilong tupela i luksave long NRLLG bikos ol i stap longwe tumas long tupela distrik.

Em i tok Flai Riva Provinsal Gavman Ekseketiv Kaunsil (PEC) long disisen bilong ol namba 66/2021 i tok long sabmisen bilong Not Flai Distrik Divelopmen Atoriti ol i apruvim trensfe bilong NR LLG long Middel Flai i go long Not Flai distrik.

NFDDA siaman i tok klia olsem PEC i dairektim Westen Provinsal Edministresen long mekim dispela i klia long Nesenel Ekseketiv Kaunsil (NEC) na Dipatmen bilong Provinsal Lokal Level Gavman Afeas (DPLLGA) long endosim na gasetim na mekim kamap lo.

Donald i tok PEC i wok long tupela hap bilong sabmisen disisen namba 69/2021 long kisim tok orait bilong ol LLG bilong Not Flai Open Ilektoreit long brukim sampela moa LLG.

Ol LLG we PEC i bin toktok long en em: NRLLG bai i stap olsem na nupela plen bilong Bedamuni LLG bai kamap wantaim gavman stesin long Mogulu.

Kiunga Rurel LLG bai stap olsem na narapela tupela LLG bai kamap em Strickland LLG na gavman stesin bai stap long Iowara na Yongom LLG bai putim ol long Atkamba.

Ningerum LLG i stap olsem na tupela nupela em Aekyom na West Ningerum stesin bilong tupela bai kamap long Hawenai na Okau.

Olsobib i stap na tupela nupela bai kamap long Kaban Blutter na Murray Valley na stesin bilong bai stap long Dumunak na Selbang.

Donald i tok sampela wik bihain NFDDA bai stat long toktok wantaim DPLLGA na Elektoral Baundri Komisin (EBC) long givim sabmisen long NEC.

“Disisen long LLG, DDA na PEC level em mipela i mekim pinis na fainel sabmisen i go long NEC em bai mipela wokim long ol i ken lukluk na apruvim na gasetim long em i ken kamap lo,” em i tok.