PLANTI ol pasin nogut, korapsen o piksa nogut i kamap long intanet i mekim wok bilong Censorship i go hat long taim kantri i wok long bungim bikpela salens.

PNG Sif Sensa Jim Abani i mekim dispela toktok long taim bilong Wol Telekomyunikesen na Infomesen Sosaiti selebresen.

“Wok bilong dispela ogenaisesen em long was na lukim wanem ol kain infomesen i mas kam insait long kantri olsem pablikesen, muvi o ol kain samting i ken helpim ol pipel.

Em i tok gavman i wok hat long bringim komyunikesen i go long olgeta hap bilong kantri long mekim laip i sita sol planti giaman tingting na samting nogut i wok long bagarapim ol komyuniti na wok bilong sensa  long katim daun dispela hevi i wok long go hat na wok bilong strongim Kristen veliu na prinsipeli gat bikpela salens tu.

“Olgeta taim mipela mas lukim infomesen we i wok long kamap long wol na dispela i ken mekim luksave na pilim o save wanem senis i wok long kamap nau long helpim ol pipel.

“Bikos teknolojii wok long senis. Mipela i wok long tokim ol bisnis na ol narapela gavman ejensi na ol wan wan pipel long bihainim lo bilong kantri long yusim ICT.

“Opis bilong Censorship i bilong olgeta. Mipela bai i no inap i go long olgeta haus, olgeta wok ples na tokim yupela long hau long yusim intanet o sosol midia.

“Yupela yet mas stretim yupela yet na mekim ol gutpela disisen na mi bilip yumi inap helpim yumi yet,” em i tok.

Abani i tok opis i lukim olsem planti ol samting i nogut i wok long kamap we sampela samting lo bilong kantri i tambuim i stap long onlain.

“Yumi mas lainim pasin bilong bihainim lo na Kristian bilip bikos kantri bilong yumi em i Kristen kantri na yumi mas traim long strongim pasin Kristen.

“Yumi olgeta i gat wanpela polisi we i lukautim ol pipel na ol yangpela bilong yumi long stap bilong ol long bihain taim,” Abani i tok.

Joseph Dawai i raitim