PAPUA Niugini Kantri Pati bai wok hat long strongim ol rurel komyuniti, pati presiden, Nelson Duwabane i tok.

Em i tok Kantri Pati i bin kamap long 1967 na wanpela bilong ol politikal pati i stap longpela taim tru.

Duwabane i tokaut long Donald Lilo olsem vais presiden long Hailans rijon na Robert Baraokove, Paul Hiemute na Marcus Tanika olsem ol pati brens presiden long Daulo, Goroka na Kainantu long Isten Hailans.

Em i tok pati i gat strongpela beis long Isten Hailans na ol arapela provins olsem Simbu, Madang, Galp, Jiwaka na Morobe.

Em i tok i gat sapota bilong pati i stap tu long ol arapela provins.

Pati i kamapim distrik brens long Ijivitari ilektoret (Noten) em Mackenzie Saofe i go pas wantaim helpim bilong Walter Onia, Wadman Jajara, Raygari Sawana na Simon Ija.

Mista Duwambane i tok bikpela polisi bilong pati em bilong strongim ol rurel manmeri long wok bilong egrikalsa.

“Dispela pati i bilong ol liklik lain manmeri,”em i tok.

“Mipela i laik lukim ol liklik manmeri i gat rot bilong mekim mani long strongim sindaun bilong ol.

“Egrikalsa i bikpela rot we pati i laik yusim long tokaut long polisi bilong em.”

Nau yet Galp Gavana, Chris Haiveta, i palamenteri lida bilong pati.

Narapela memba husat i bin stap palamen memba bilong pati em Richard Mendani husat i dai long Mas dispela yia.

Ol olpela lida em Dobodai Wautea,pastaim memba bilong Kikori Open, pastaim Gavana Jeneral Sir Tore Lokoloko (Kerema) na Mackenzie Daugi (Oro rijonal).