NIMAMAR kaunsil i wokbung wantaim Nu Ailan Provinsal Gavman (NIPG) long kamapim ol wok na ranim lokal level gavman bilong em.

Nimamar o Tumbawinlan (Haus man) Lokal Level Gavman (LLG) i LLG long provins we i gat planti mani.

Dispela em bikos em i save ksim ol royalti, ekwiti na kompensesen mani long Lihir Gol Main long Nu Ailan Provins.

Kaunsil i bin gat tingting bilong kamapim na mekim semba bilong em tasol bihain long em i kisim nius olsem NIPG i gat plen na i wok long stretim ol LLG semba long provins, em i senisim tingting na wok bung wantaim NIPG long stretim semba bilong em.

LLG i tokaut long tingting bilong em long taim em i bung wantaim ol opisa bilong NIPG, Woks Dipatmen na kontrakta, CRCG long wokim ol rot, haus na ol arapela wok divelopmen.

Deputi Presiden na Siaman bilong liklik i go inap long namel sais bisnis (SME) Sebastian Siandodo, i makim maus bilong kaunsil na tokaut long dispela tingting long las mun.

Mista Siandodo i tok olsem Lihir LLG bai givim K1 milien long NIPG long stretim Nimamar LLG semba.

Em i tok LLG bai kamapim haus long wei em i laikim long em.

Em i tok semba i laikim tupela konprens rum, moa opis na i soim Kabai kalsa mak long fran bilong en.

“Nimamar Kaunsil i bin plen long kamapim kaunsil semba bilong em yet tasol taim mipela i harim Nu Ailan Gavman i wok long wokim ol kaunsil semba long ol 10-pela lokal level gavman eria, mipela i lusim na wokbung wantaim long kamapim semba bilong mipela,” Siandodo i tok.

Long wankain taim, kaunsil i wok long lukluk long rolimaut dispela NIPG Laiting Nu Ailan polisi long tripela ailan ausait long bikpela Lihir ailan.

“Mipela i lukim gutpela bilong polisi na olsem mipela i laik wok bung wantaim provinsal gavman na kamapim dispela program.”