Transparency International PNG (TIPNG) i gat sampela strongpela askim i go long Nesenel Geming Kontrol Bod (NGCB)  planti yet long dispela plen bilong bildim wanpela casino long Pot Mosbi.

NGCB i save kisim takis long olgeta ektiviti bilong ol pilai laki, olsem na ol i gat rait long makim gavman na tok strong na mekim strongpela disisen insait long MOU bipo long gavman na developa bilong casino i sainim tok orait.

TIPNG i tok ol toktok we siaman bilong NGCB i bin mekim long taim bilong sainim MOU i soim olsem NGCB i gat bikpela laik long kisim dispela casino i kam. Tasol long lukluk bilong TIPNG, NGCB em i reguleta na em inap long stap long sait na skelim gut ol gutpela na nogut bilong casino na i no lukluk long wanpela sait tasol.

Siaman bilong TIPNG, Peter Aitsi i tok, “Sapos dispela casino i kamap, em bai daunim strong bilong gavman na dipatmen we i save lukautim geming indastri olsem na jeneral pablik i gat rait long mekim sampela askim na save gut long olsem wanem NGCB i save mekim ol disisen bilong en.”

“Mipela i gat ol dispela tingting bikos Auditor General Report bilong 2020 i tok klia olsem NGCB i no bin givim wanpela fainensel ripot long 2017 i kam inap nau. Bikos NGCB i save kisim ol mani bilong pablik, ol pablik i gat rait long save hamas NGCB i save kisim long wan wan sekta long wan wan yia na ol i save putim ol dispela mani we. Na tu, sapos i gat sampela tingting long putim mani bilong pablik i go insait long dispela nupela casino, orait ol pablik i gat rait long save,” Mista Aitsi i tok.

TIPNG i tok long ekspiriens bilong ol arapela kantri long wol, taim strong bilong reguleta i go daun, na taim casino i stap insait long kantri bilong ol, planti paul pasin bilong mani i save kamap na kriminel ektiviti tu i  save go antap.

TIPNG i singaut long NGCB long mekim klia long pablik husat ol projek patna insait long dispela casino projek. Ol pablik mas tingting planti long fainensal menesmen bilong NGCB na ol infomesen em i wok long haitim long pablik.